ملي غادي يولي الصوت ديالك كيوقع ليه نفس داكشي لي كيوقع للتصاور ديالك فلفوطوشوب، هاد النظام سميتو  »فوكو » ولي طوراتو شركة ٲدوبي، من خلال واحد الجمل غادي تقولها كيقدر يشكل ٲي جمل و كلمات بالصوت ديالك، وهنا عاوتاني كين واحد التخوف لي هو نخليو شي واحد يقول شي حاجة ما قالهاش من خلال نقل الٲصوات و خصوصا ٲن الٲصوات ديالنا منتشرة فكل من فايسبوك و واتساب…و التحدي الكبير غادي يولي هو التفريق ما بين صوت حقيقي و صوت مصاوب فحال الفوطوشوب خصوصا صوت الشخصيات السياسية و المشهورة…وهنا جاتني واحد الفكرة زوينة و هي ٲن هاد النظام ممكن يخلينا نعاودو نسمعو الصوت ديال الناس لي عزاز علينا و لي مبقاوش معانا و هما كيقولو لينا شي حويج لي ممكن تفرحنا…المرة جيا غادي نهدر ليكم على نظام آخر و لي غادي يدير ضجة ديال بصح و لي إذا قدرنا نجمعو بينتهم غادي دار واحد الضجة بحيت غادي يولي صعيب تفرق ما بين الواقع و المفبرك.

باحثين في جامعة واشنطن تمكنو مؤخرا من فبركة فيديو شبه حقيقي انطلاقا من فيديو قديم…لبلان أنك غادي تشوف فيديو تصوب باستعمال الذكاء الإصطناعي (A.I) لي تمكن أنه يحلل و يقلد تحركات شفاه الرئيس السابق أوباما و لي من الصعب أنك تعرف بلي راه غير مفبرك (الفيديو فالأخير ديال التدوينة)…باش نزيد نشرح ليك كثر هو ممكن اليوم إذا فهمتي كيفاش كيخدم لوجسيييل ولا لبروكرام لي كيخدمو به، ممكن تاخد الصوت ديالك و وبعض الصور مأخودة من زوايا مختلفة و بالتالي تصوب فيديو كتبان فيه نتا فحال كتقول داكشي لي من المفروض كان غير صوت اعتمادا على ما يسمى اليوم قسمات ولا تعابير الوجه و خصوصا حركات الشفاه ديالك من فيديو قديم كتهدر فيه…الفكرة ساهلة و واضحة و لي باغي يفهم أكثر يشوف لفيديو و يشوف المصادر…دابا إذا استعملنا اللوجسييل لي تكلمنا عليه سابقا ولي سميتو  »فوكو » و لي به كنقدرو نخليو واحد الإنسان يقول شي حاجة حنا بغيناه يقولها انطلاقا من مجموعة ديال الأصوات ديالو لي كنا سجلناها و لا لقيناها ديجا مسجلة , غادي يمكن لينا نفبركو أي فيديو بالصورة و الصوت لأي واحد كتوفر عندنا منو هاد المعطيات لي ذكرنا، و هادشي غادي يخلينا نشكو مستقبلا فأي فيديو شفناه خصوصا إذا كان ديال شي شخصية مؤثرة حيت ممكن يكون غير مفبرك، يعني كيخصنا نتأكدو مزيان…لمهم هادشي مازال بعيد علينا و دويت فيه من جانب الإكتشاف و المعرفة و لي بغا يزيد يبحث أكثر في الموضوع راه الناس فعلا خداما ديال بصح و الإبداع عندو أشكال و أنواع و كنتمناو هادشي يستعمل فشي حويج زوينة وشكرا على القراءة و المتابعة.

شرح مبسط لكيفية فبركة فيديو الرئيس السابق أوباما : https://www.youtube.com/watch?v=AmUC4m6w1wo